Ons studente is vir ons belangrik, en daarom bied Akademia vanjaar aan eerstejaars toegang tot ʼn gratis aanlyn kursus om die kuns van studentwees baas te raak – selfs nog voordat hulle amptelike oriëntering afskop. Hier word nuttige temas soos basiese rekenaarvaardighede, hoe om vir die akademiese jaar voor te berei, akademiese taal- en skryfvaardighede, basiese akademiese navorsing en wenke vir die aflê van assesserings hanteer. Ons glo dat hierdie kursus skoolverlaters nóg beter voorberei voordat hulle met die akademiese jaar begin.

Akademia bied ondersteuning aan haar studente in die vorm van berading, leerondersteuning en leerontwikkeling, mentorskap- en leierskapsprogramme, asook die ontwikkeling van sekere vaardighede om die studente gereed te maak vir hulle studies sowel as die werksplek. Hierdie ondersteuning en ontwikkeling vind plaas deur verskeie aksies en programme wat aangebied word deur die loop van die jaar waaraan studente kan deelneem. Akademia se studente kan verder ook berading en emosionele ondersteuning ontvang deur die instelling se studenteondersteuningskoördineerder, ʼn gekwalifiseerde berader. Die welstand en gesondheid van Akademia se studente is vir haar van kardinale belang en by ons word daar werklik omgegee!

“My rol as studenteondersteuningskoördineerder by Akademia beteken dat ek hier is om studente te ondersteun deur emosionele en/of onderrig- & leeruitdagings waarmee hulle worstel. Ek het ʼn groot passie en liefde daarvoor om jongmense by te staan deur hierdie moeilike omstandighede en om te help soek na oplossings vir die situasie. In my rol by Akademia kry ek die geleentheid om juis dit te doen – om saam met ʼn student te “wandel” deur uitdagings van die lewe en te kyk hoe dit aangepak kan word.

Ons, hier by Akademia, wil graag bydra tot die vorming van ons studente op alle gebiede, hetsy dit emosioneel is, op ʼn akademiese vlak, om gereed te wees vir die professionele wêreld van werk, ensovoorts. Ons besef dat daar soms uitdagings is wat ʼn hindernis word in die pad na sukses (onder andere tussen ʼn student en sy/haar kwalifikasie) en wil ons graag ʼn student bystaan en optimale ondersteuning verskaf om oor daardie hekkie te kom en om suksesvol by die eindstreep uit te kom – nie net in sy/haar studies nie, maar ook in die lewe vorentoe. Dit is daarom deel van my rol om deur middel van berading/ondersteuningsessies, saam met die student te ontdek of hierdie hindernis akademies van aard is of weens persoonlike omstandighede/die student se verlede, en om dan oplossings te vind om hierdie hindernis uit die weg te ruim waar moontlik. Oplossings vir die hindernisse kan wees om die regte leertegnieke te vind, vaardighede aan te leer om stres en/of tyd effektief te bestuur, ontwikkeling van die verskillende funksies van die brein, die hantering van emosionele uitdagings/situasies, leierskapsontwikkeling, ensovoorts.

Die ondersteuning wat ek bied is enige tyd beskikbaar vir voltydse, nauurse studente ( by studiesentrums of via e-leer) van Akademia en kan deur middel van aanlyn platforms, telefonies of in persoon gedoen word. Tussen Julie en November 2021 het daar 68 konsultasiesessies plaasgevind op die verskeie wyses.

Studente van Akademia is welkom om my enige tyd te kontak op een van die volgende twee e-posadresse: vangnet@akademia.ac.za of michellevn@akademia.ac.za; of deur ʼn vorm te voltooi op die Spens om ʼn afspraak by my te maak. My deur staan altyd vir julle oop!

In hierdie rol waarin ek myself tans bevind, voel ek dat ek die geleentheid het om nie net my passie nie, maar ook my roeping uit te leef en by te dra tot die groei en toekoms van ʼn jongmens. En vir dit, is ek ewig dankbaar.”

“Daar is verskeie redes hoekom oud-Akademia-student uitgeken sal word teenoor ander studente dwarsoor die wêreld. Een van die hoofredes is ons studentelewe. Studentelewe is deesdae ʼn breë woord en kan afhangend van die konteks verskeie betekenisse hê. Wat egter uitstaan by Akademia is die balans waarmee hierdie studentelewe aangepak word. Die studentelewe leer ons om verantwoordelikheid vir ons eie besluite en aksies te neem. Akademia lê groot klem op hierdie gebalanseerde benadering en dit is my rol as studentesakekoördineerder om hierdie studentelewe verder te ontwikkel.

Ek het ervaring in studenteleierskapstrukture oor die jare opgedoen en weet hoe baie dit tot my ontwikkeling en vorming bygedra het. Akademia skep daarom vir ons studente die platform om nie net hulle talente uit te leef nie, maar ook verder te ontwikkel. In my rol tans fokus ek grotendeels op die ontwikkeling en werksaamhede van die studenteraad (SR) asook huiskomitees (HK). Ek is ook betrokke by alle studenteaktiwiteite se beplanning en die reël daarvan. Ek het ʼn groot passie vir studente en ek dink dit is die belangrikste tyd van mens se lewe in terme van vorming en blootstelling. Dus fokus Akademia op die ontwikkeling van ʼn gesonde en gestruktureerde studentelewe. Dit is ongelooflik om te kyk hoe kreatief en gemotiveerd ons eie studente is en dit wys ook in al die verskeie aktiwiteite wat alreeds plaasvind.

Dit maak my trots en gelykertyd dankbaar om te sien hoe vinnig ons studentelewe ontwikkel en dit is ʼn voorreg om deel te wees daarvan.”

Studente kan solank ʼn voet in die deur kry om hulle loopbaanreise af te skop! Akademia het in 2021 Loopbaanontwikkelingsprogram geloods – ʼn projek wat akademiese opleiding en praktiese toepassing in die werksplek kombineer. Dié program vorm deel van Akademia se opvoedingsideaal om afgeronde Afrikaanse studente aan gemeenskappe te lewer. Hierdie program bied die ideale geleentheid om waardevolle blootstelling in die werksplek op te doen. Wie weet, dalk ontdek studente nuwe vaardighede, hoor van nuwe loopbaanrigtings of smee bande met ’n toekomstige werkgewer. Die program bied ook insig in die verskillende loopbaanroetes wat ʼn individu met ʼn bepaalde kwalifikasie kan betree.

Enige student, ongeag die onderrigmodel, wat reeds vanaf hulle eerste studiejaar met loopbaanontwikkeling wil begin kan vrywillig aan die loopbaanontwikkelingsprogram deelneem. Studente wat inskryf moet bereid wees om genoegsame tyd te bestee om die program te voltooi. Die Loopbaanontwikkelingsprogram word oor drie jaar voltooi, waarvan die eerste jaar hoofsaaklik gefokus is op blootstelling aan die praktyk. Die tweede jaar fokus op internskappe en mentorskappe, en die derde jaar se fokus lê in werkservaring.