Akademia is ʼn geregistreerde onafhanklike hoëronderwysinstelling met twee onderrigleermodelle, naamlik die voltydse kampusmodel en die nauurse afstandsmodel. Akademia het ʼn pos vir ʼn adviseur: Bemarking in die Bemarking en Kommunikasie-afdeling beskikbaar. Hierdie pos is gesetel in die Kaap, met die doel om Akademia se studentevoetspoor in die Wes-Kaap skerp uit te brei. Akademia het tans sentrums (vir nauurse afstandstudie) in die Wes-Kaap in Somerset-Wes, Paarl en George, en beoog om teen 2026 ʼn voltydse kampusaanbod in die Paarl-omgewing daar te stel. Om te kwalifiseer word ʼn graadkwalifikasie in Bemarking of Kommunikasie of ander relevante rigting (NKR-vlak 7) en ʼn minimum van drie jaar se relevante ervaring in die hoëronderwysomgewing vereis.

Die pos se hooftaak is om Akademia aan voornemende studente te bemark en studieaansoeke in die streek te verhoog deur uitnemende advieslewering te bied en om voornemende studente te vergesel op die studieaansoekreis. Die posbekleër sal die instelling verteenwoordig by skole en die sakebedryf, en die persoon word getaak om nuwe markte te ontgin ten einde studente vir beide onderrigleermodelle te werf. Daar sal verder van die posbekleër verwag word om ʼn wye spektrum van werwing- en bemarkingsaktiwiteite vir Akademia te inisieer en te implementeer in samewerking met die koördineerder: Bemarkingsprojekte. Voorts word daar van die posbekleër verwag om Akademia by loopbaanskoue en ander bemarkingsgeleenthede te verteenwoordig; verhoudings en netwerke met die sakesektor, skole en gemeenskappe te bou; asook gemoeid te wees met verskeie ander aspekte wat met kommunikasie en die skakelwese verband hou. Die ideale kandidaat moet ʼn sterk verbondenheid met Akademia se waardes en beginsels hê en ʼn diepgaande passie om voornemende studente by te staan met studie- en loopbaankeuses.

Die ideale kandidaat vir hierdie pos moet goeie verhoudings kan vestig en handhaaf met verskeie rolspelers; beskik oor goeie organisering-, tydsbestuur- en probleemoplossingsvaardighede; uitstekende kommunikasie- en interpersoonlike vaardighede; ervaring hê in die opbou, instandhouding en bestuur van ʼn databasis; moet innoverend en hardwerkend wees; onafhanklik kan werk; verhoudingsgeoriënteerd wees, inisiatief kan neem; ʼn passie vir Afrikaans hê en as ambassadeur van Akademia help om die instelling uit te bou deur studente vir studie by Akademia in te skryf, advies te lewer en voornemende studente deur die aansoekreis te vergesel.

Hierdie pos is in die Paarl-area gebaseer, en daar sal van die posbekleër verwag word om te reis en om met tye weg van die huis te slaap. ʼn Geldige bestuurslisensie en motor is vereistes vir die pos.

Klik hier om vir die pos aansoek te doen. Aansoeke moet voor of op 19 September 2024 ingedien word. Stuur ʼn e-pos na personeelnavrae@akademia.ac.za indien jy probleme met die skakel ervaar.