Ons almal ken die gesegde, van uitstel kom afstel. Indien jy nóg altyd ʼn studiedroom koester, maar jouself in dié gesegde herken omdat jy reeds voltyds in die werksplek gevestig is óf ander belangstellings nastreef, wees gerus: Akademia het ʼn nommerpas oplossing vir jou.

Die instelling se nauurse afstandsmodel is ideaal vir studente – van alle ouderdomme en van enige plek ter wêreld – wat graag ʼn gehalte kwalifikasie in Afrikaans wil behaal. Indien jy graag in 2026 ʼn studiereis wil aanpak, voeg nou reeds daad by die woord en bespreek jou plek vir Akademia se aanlyn inligtingsessie oor nauurse afstandstudiemoontlikhede wat op Saterdag 12 April vanaf 09:00 tot 10:30 plaasvind.

Meer oor die nauurse afstandsmodel

Fonties* wat van hierdie onderrigleermodel gebruik maak het ʼn keuse van deelname by wyse van ʼn netwerk van sentrums dwarsoor Suid-Afrika óf ʼn e-leeropsie. Kontaksessies vind op weeksaande en Saterdae plaas en tegnologie word gebruik om dosente en studente in virtuele leerruimtes byeen te bring.

Behalwe vir ʼn gerieflike rooster bied hierdie model ook aan Afrikaanssprekendes buite die Suid-Afrikaanse landsgrense die geleentheid om hulself akademies toe te rus. Die instelling se internasionale voetspoor strek oor onder meer Australië, Namibië, Nederland, Nieu-Seeland, Rusland, Swede, Thailand, die Verenigde Emirate en die Verenigde State van Amerika.

Só ervaar nauurse Fonties hul studiereis

Diederik du Toit (21) is ʼn LLB-vierdejaarstudent wat sy studie via die nauurse afstandsmodel aanpak. Hy vertel dat dié model, en die e-leeropsie, dit vir hom moontlik maak om sy liefde vir reis uit te lééf. Du Toit bevind homself juis op die oomblik in die Franse platteland as deel van ʼn internasionale uitruilprogram.

Tania Laing het beide die BCom (Bestuursrekeningkunde)-program én die Nagraadse Diploma in Bestuursrekeningkunde aan Akademia voltooi as ʼn nauurse afstandstudent. Dié boorling van die Paarl het by die Paarl-sentrum ingeskakel en het later na die e-leeropsie oorgeskakel. “Daar was nooit ʼn enkele geleentheid waar dit vir my gevoel het asof ek aan my eie genade oorgelaat word nie, want die ondersteuning en professionaliteit van dosente en ondersteuningspersoneel is van uitstaande gehalte,” vertel Laing.

Johan Grobbelaar (27), haker van die Springbokke en Blou Bulle, pak vanjaar sy laaste module in die BCom (Ondernemingsbestuur)-program aan. “My rugbyskedule hou my baie besig, en gedurende die laaste ses maande van 2024 was ek byvoorbeeld slegs vir vier weke by die huis,” vertel Grobbelaar en voeg by dat die e-leeropsie dit vir hom moontlik maak om vanuit ʼn hotelkamer waar hy homself ook al mag bevind aandag aan sy studie te gee. Hy kan ook vanaf enige plek ter wêreld toets skryf en eksamens aflê.

Meer oor die aanlyn inligtingsessie

Tydens die inligtingsessie, wat jy vanuit die gerief en gemak van jou eie leefvertrek kan bywoon, sal die volgende aspekte bespreek word:

• ʼn Oorsig oor Akademia;
• Die verskillende studieopsies;
• Klasbywoning;
• Die aansoekproses; en

• ʼn Interaktiewe vraag-en-antwoordsessie.

Waarvoor wag jy? Dit is nou die tyd om werk te maak van jou studiedroom. Maak seker dat jy hierdie belangrike inligtingsessie bywoon en jou nauurse afstandstudieopsies deeglik verken. Bespreek jou aanlyn sitplek hier. Studieaansoeke vir 2026 is reeds oop.

Skakel in, doen aansoek en trek met trots die Fontie-baadjie aan.

*Fonties verwys na studente wat aan Akademia studeer. Dié eienaam is afgelei uit die instelling se leuse, Ad futurum per fontes – na die toekoms deur die bronne.