Op 11 Junie word Internasionale Speeldag gevier en word daar wêreldwyd opnuut na die kritiese rol wat spel in elke kind se ontwikkeling speel gelet. Dié dag, wat met die ondersteuning van organisasies soos UNICEF van stapel gestuur is, beklemtoon die feit dat spel nie ʼn luuksheid is nie, maar eerder ʼn universele reg is wat elke kind toekom terwyl dit óók die grondslag vir gesonde ontwikkeling lê.

Spel word dikwels as bloot ʼn prettige aktiwiteit gesien, maar die impak daarvan is veel dieper. Dit is deur spel dat kinders hul wêreld verken, hulself uitdruk en belangrike sosiale, emosionele, fisieke en kognitiewe vaardighede ontwikkel. Hiermee saam help dit jong kinders om holisties te groei – nie net liggaamlik nie, maar ook emosioneel en geestelik.

Holistiese ontwikkeling behels die koestering van al die aspekte van ʼn kind se ontwikkeling, en spel is een van die mees doeltreffendste maniere om dié ontwikkeling te fasiliteer. Óf dit nou die bou van ʼn legkaart, fantasiespel as dokter, boomklim, óf die konstruksie van ʼn toring met blokke behels. Elke vorm van spel dra by tot die ontwikkeling van verskillende vaardighede:

• Kognitief
  Bevorder denke, geheue en probleemoplossingsvaardighede.
• Emosioneel
  Help kinders om emosies te verwerk en veerkragtigheid te bou.
• Fisiek
  Groot en fyn motoriese vaardighede word deur aktiewe spel ontwikkel.
• Sosiaal
  Samespel met maats leer kinders om saam te werk, empatie te toon en te kommunikeer.
• Kreatief

  Fantasiespel stimuleer verbeelding, selfuitdrukking en innoverende denke.

UNICEF beklemtoon voorts dat spel nie nét pret is nie, dit is ook fundamenteel tot ʼn kind se ontwikkeling. Dit is hoe kinders leer: nie deur akademiese druk te ervaar nie, maar deur vreugde, ontdekking en nuuskierigheid. Ouers speel ʼn deurslaggewende rol in die skep van ʼn spelrykeomgewing. Hier is vyf eenvoudige riglyne om spel tuis gemaklik en betekenisvol aan te moedig:

• Prioritiseer spel
  Verseker dat jou kind elke dag tyd kry vir vryspel, binne of buite.
• Speel saam
  Neem deel aan hul speelwêreld; dit versterk jul band.
• Beperk skermtyd
  Skep balans deur eerder fisieke en kreatiewe spel aan te moedig.
• Laat die kind leiding neem
  Laat die kind se belangstellings en verbeelding die spel rig.
• Skep ʼn veilige omgewing

  Nie net fisiek nie, maar ook emosioneel, sodat jou kind vry voel om hulself te wees.

Mag Internasionale Speeldag ons daaraan herinner dat spel nie nét ʼn pret aktiwiteit vir ʼn kind is nie, maar ʼn lewenswyse. Méér nog: ʼn lewenswyse wat die grondslag lê vir gesonde groei en ontwikkeling op die mees natuurlike en vreugdevolle manier moontlik. Vir meer inligting asook hulpbronne oor die waarde van spel in die ontwikkeling van jong kinders, besoek gerus UNICEF se Learning through play-webtuiste.

Akademia se Fakulteit Opvoedkunde bied aan voornemende studente die geleentheid om een van twee programme via die instelling se voltydse kampusmodel te studeer, naamlik BEd (Grondslagfase-onderwys) óf BEd (Intermediêre Fase-onderwys). Die nauurse afstandsmodel maak voorsienning vir studente om die Nagraadse Onderwyssertifikaat (Senior Fase- en Verdere Onderwys en O-onderwys)-program asook die instelling se nuwe Nagraadse Diploma in Skoolleierskap en -bestuur-program. Aansoeke vir die 2026- akademiese jaar word nou ingewag.