Die finale ronde van Akademia se jaarlikse Woordmeesters-taalkompetisie, in samewerking met die Virtuele Instituut vir Afrikaans (VivA) en Die Papier as mediavennoot, wink. Ná die aanlyn taaltoetse afgehandel is en die deelnemers se puntestand bereken is, word die hoed gelig vir die topdriefinaliste in elk van die drie kategorieë. Hierdie taalfundi’s, wat uit meer as 870 deelnemers landswyd uitgeblink het, sal op Afrikaanse Taaldag, 14 Augustus, meeding om die titel van Woordmeester 2026. Die finaal sal op Akademia se Leriba-kampus in Pretoria plaasvind.

Benewens die prestige wat met die titel gepaardgaan, is daar ook groot pryse – insluitend kontant – op die spel. Verskeie ander vennote* voeg ook hul steun tot dié projek.

Die topdriefinaliste in elk van die kategorieë is:

• Skoolkategorie (graad 10 tot 12)

Amelia Minnar, Hoër Meisieskool Paarl
Rian Knoesen, Hoërskool Menlopark
Gerlú Mountany, Hoërskool Frikkie Meyer

• Studentkategorie

Megan Muller, Noordwes-Universiteit (NWU)
Chanelle Beukes, Akademia
Ildamarie Botha, Universiteit van Pretoria (UP)

• Publiekkategorie

Morné van Rooyen, Bloemfontein
Ranya van der Walt, Centurion
Crisna Bezuidenhout, Pretoria

Ervare woordmeesters dien as beoordelaars

Die finale ronde word beoordeel deur vyf gesiene taalkundiges en taalpraktisyns wat elk oor jare se akademiese en professionele ervaring beskik.

• Ansie Maritz, voltydse dosent in Afrikaanse taalkunde aan die Universiteit van Pretoria (UP), beskik oor ʼn meestersgraad in Afrikaanse variasietaalkunde en ʼn doktorsgraad in algemene taal- en literatuurwetenskap.
• George de Bruin, taalpraktisyn en toegepaste taalkundige, is ʼn lid van die Suid-Afrikaanse Akademie vir Wetenskap en Kuns (SAAWK) sowel as die International Community Translation Research Group en beskik oor uitgebreide ervaring in toegepaste linguistiek.
• Karien Brits, dosent in Taalpraktyk en Sepedi aan Akademia, is reeds meer as twee dekades in die universiteitswese betrokke en is ʼn ontvanger van die Afrikaanse Taalraad se Kokertoekenning vir haar bydrae tot die bevordering van Afrikaans.
• Maureen van Helden, taaladviseur by VivA, bring meer as twintig jaar se ervaring as proefleser, redigeerder, vertaler en taalpraktisyn na die beoordelaarspaneel. Sy is ook aktief betrokke by verskeie ander taalkompetisies.

• Suléne Pilon, beskrywende taalkundige aan die Universiteit van Pretoria (UP), dien onder meer as moderator van die morfologie- en sintaksisafdeling van VivA se Afrikaanse Taalportaal en is voorsitter van die SAAWK se Taalkommissie.

Volgens Mareli Swanepoel, bestuurder: Institusionele projekte en ondernemings by Akademia, weerspieël die ervaring en diepte van die beoordelaarspaneel die standaard waarna die Woordmeesters-taalkompetisie streef. “Woordmeesters wil deelnemers nie net beloon vir goeie taalgebruik nie, maar hulle ook uitdaag om die wetenskap, struktuur en rykdom van Afrikaans te ontdek. Daarom is dit vir ons belangrik dat die finaal deur kenners beoordeel word wat self ʼn diepgaande bydrae tot die ontwikkeling van Afrikaans lewer,” sê Swanepoel.

Soos die kompetisie sy 2026-hoogtepunt nader, bly Woordmeesters ʼn viering van Afrikaans as ʼn taal wat nie slegs gepraat word nie, maar ook met sorg, kennis en liefde beoefen word. Deur inisiatiewe soos hierdie word nuwe geslagte taalgebruikers aangemoedig om Afrikaans nie net te gebruik nie, maar dit doelbewus te slyp, te koester en verder uit te bou.

*Ander vennote wat aan dié taalinisiatief deelneem, sluit in Afrikaans.com, AfriForum, Weet, Penguin Random House South Africa, Stimulusmaksima en Jonathan Ball Publishers.