Studieaansoeke vir 2025 is reeds oop

Search
Close this search box.

Bemarkings- en kommunikasiekomitee ondergaan opwindende veranderinge

Geskryf deur Kayla Roets, joernalis by die Fontiepos

Akademia-studente se Bemarkings- en Kommunikasiekomitee skud sy vere reg vir ʼn tydperk van verandering in die lig van die uittrede van Cornel Rautenbach. Rautenbach was die studenteraadslid vir Bemarking en Kommunikasie. Hy vertrek om ʼn opwindende nuwe werksgeleentheid aan te pak wat ʼn nuwe hoofstuk in sy professionele reis begin. Die Fontiepos is opgewonde oor sy toekomsvooruitsigte en dankbaar vir sy bydrae tot die instelling se bruisende studentelewe tydens sy ampstermyn.

Gedurende sy tyd as SR-lid het Rautenbach waardevolle bydraes gelewer, die komitee se strategieë uitgebou en ʼn onuitwisbare indruk in die Akademia-familie gelaat. Sy innoverende denke, onwrikbare toewyding en ongeëwenaarde passie het ʼn deurslaggewende rol in die komitee se groei en sukses gespeel. Benewens sy professionele prestasies, het Rautenbach vanjaar ook ʼn persoonlike mylpaal behaal. Hy het sy PH-kursus (Persoonlike Jagter) suksesvol voltooi, wat sy toewyding tot persoonlike groei en die nastrewing van uiteenlopende belangstellings toon.

Om ʼn naatlose oorgang in leierskap te verseker, sal Demarco Robinson, die huidige ondervoorsitter van die SR: Bemarkings en Kommunikasieportefeulje, vir die res van die termyn die rol van waarnemende SR vir Bemarking en Kommunikasie aanvaar.

Met Robinson se aanstelling bly die komitee vol vertroue in die voortgesette sukses van die Bemarkings- en Kommunikasiefunksie in die studentegemeenskap. Sy strategiese aanleg, sterk interpersoonlike vaardighede en vertroudheid met die span sal die handhawing van ʼn positiewe werksomgewing en die voortsetting van innoverende veldtogte verseker.

Terwyl die span vorentoe kyk na die volgende hoofstuk, is hulle opgewonde oor die positiewe impak wat Robinson se leierskap sal meebring, asook die nuwe moontlikhede wat vir die Bemarkings- en Kommunikasiekomitee voorlê.

Cornel Rautenbach het onlangs uitgetree as SR: Bemarking en Kommunikasie.
Demarco Robinson sal vir die res van die termyn optree as waarnemende SR: Bemarking en Kommunikasie

Alle Fontiepos-artikels is deur studente vir studente geskryf en weerspieël nie noodwendig Akademia se mening of standpunt nie.