Akademia se nauurse afstandsmodel is aantreklik vir studente wat nie voltyds op kampus kan of wil studeer nie. Talle studente kies om te werk of ander belangstellings na te streef terwyl hulle studeer. Akademia se sentrums, waar nauurse afstandstudente klas met hulle eie skootrekenaars en oorfone bywoon, is ingerig as netjiese saamwerkruimtes met wissellessenaars. Saamwerkruimtes bied stabiele krag en gratis breëband-internettoegang op veilige persele. Die ideale van Akademia as gemeenskapsuniversiteit word deur hierdie sentrums vergestalt deurdat bande gesmee word, gesprekke gevoer word en vriendskappe gebou word. Akademia-studente (bekend as Fonties) wat goedkeuring ontvang het om via die e-leeropsie klas te draf, skakel ook aanlyn by kontaksessies in. In die tye tussen kontaksessies word studente se leerproses gerig deur ʼn vooraanstaande leerbestuurstelsel genaamd die Spens. Ná afloop van klaskontaksessies word die opnames binne enkele dae op die Spens vir studente beskikbaar gemaak. Hier kan studente video-opnames van die kontaksessie aflaai of argiefmateriaal bestudeer. *Studente word outomaties ingedeel om verpligte kontaksessies by ʼn sentrum by te woon. ʼn Spesiale aansoek kan voltooi word om vir e-leer oorweeg te word.