Studieaansoeke vir 2025 is reeds oop

Search
Close this search box.

ʼn Blik op Akademia se prestigeleierskapskamp vir 2023

Geskryf deur Kayla Roets, Fontiepos-joernalis

Conclave Country Lodge lê diep in die bosse, waar die rustigheid van die natuur gevier word. Hierdie versteekte juweel bied werklik ʼn buitengewone ervaring en spog met luukse verblyf, onvergeetlike maaltye en ʼn atmosfeer wat gaste toelaat om hulself in die skoonheid van hul omgewing te verdiep. Akademia het ʼn paar studente gekies om by hierdie spesiale plek op vanjaar se prestigeleierskapskamp te gaan sodat studente hulle leierskapvermoëns kan ontwikkel.

Studente het met aankoms ʼn nommer getrek wat kamermaats aan mekaar toegeken het. Min het hulle geweet dat hierdie oënskynlik klein detail sou bydra tot die ongelooflike reis wat voorlê.

Die ysbrekerspeletjies wat daarna gevolg het, het vir almal ʼn geleentheid gebied om verhoudings te smee. Studente is met besluite gepeper, soos om te besluit of hulle eerder sou smul aan hul ma se tuisgemaakte maaltye, in ʼn sjokoladebad sou bad, of die eenvoudige vreugdes van die plaaslewe sou ervaar. Verrassende reaksies het uit onverwagte bronne na vore gekom, wat die diepte en verskille binne die groep onthul het.

Verdere uitdagings het kommunikasievaardighede getoets, aangesien studente die taak gekry het om as ʼn groep te beweeg sonder verbale leidrade, wat almal laat kopkrap het. Die dobbelsteenspeletjie, waar antwoorde bepaal is deur die getal wat gerol is, het ʼn element van toeval en opwinding bygevoeg. Elke oggend is die groep by verskillende spanne ingedeel, wat ʼn gees van kameraadskap bevorder het en die vorming van nuwe vriendskapsbande moontlik gemaak het.

Dwarsdeur die kamp is genoeg tyd aan introspeksie afgestaan. Onder leiding van Paul Smith is studente aangemoedig om hul persoonlike “hoekom” te ontdek – die dryfkrag agter hul ambisies en drome. Hierdie oefening het ten doel gehad om outentieke leierseienskappe op te spoor en die belangrikheid van geloof en Christelike beginsels te beklemtoon. Myrtle Endley, die voorsitter van die studenteraad, en Douard d’Assonville, bestuurder van studentelewe en koshuise, het die groep ingelig oor die struktuur van die leiersposisies, wat die weg gebaan het vir ʼn nuwe hoofstuk van groei en ontwikkeling.

Aande was gevul met gelag, terwyl studente met mekaar gekuier het en betrokke was by lewendige bordspeletjiekompetisies. Op die tweede laaste dag het aktiwiteite ʼn meer avontuurlike toon aangeneem. Spanne is uitgedaag om ʼn brug te bou deur pale binne ʼn vasgestelde tydraamwerk te gebruik, wat effektiewe spanwerk en vindingrykheid vereis het. Geblinddoekte boogskiet het vertroue en kommunikasie getoets, aangesien studente op hul spanmaats staatgemaak het om hulle in die regte rigting te lei.

Natuurlik sal geen kampervaring volledig wees sonder om tradisionele potjiekos te kook nie. In ʼn ware toets van uithouvermoë het spanne die versengende hitte op ʼn staptoer met passers aangedurf, op soek na stalle en toerusting. Die uitdagende terrein het sommige onkant gevang, wat tot oomblikke van uitputting gelei het, maar gelukkig het almal veilig teruggekeer, nadat een van die spanne wel die verkeerde roete geneem het.

Met insiggewende lesings en betekenisvolle Bybelstudiesessies, het die studente die kamp verlaat met ʼn diep gevoel van geloof en selfontdekking. Die tyd het heeltemal te vinnig verbygevlieg en het studente met ʼn bittersoet gevoel gelaat toe hulle hul nuutgevonde vriende en die kamp wat ʼn tydelike tuiste geword het, vaarwel geroep het. Dankbaarheid het hul harte gevul vir die vier dae van luukse ontspanning en die transformerende sessies wat persoonlike groei en introspeksie bevorder het.

Die studenteleiers het met aandag na Paul Smit se lesing oor leierskapsontwikkeling geluister.

 

Studente besig om ʼn brug te bou met pale wat spanbou bevorder het.

 

Een van die groepe veilig terug by die kamp na ʼn verdwaal-sessie.

 

Een van die spanne hard aan die werk met hul potjiekoskompetisie.

 

Alle Fontiepos-artikels is deur studente vir studente geskryf en weerspieël nie noodwendig Akademia se mening of standpunt nie.