Akademia as onafhanklike hoëronderwysinstelling sal in 2025 roepingsgedrewe voortbou op die positiewe momentum wat in die voorafgaande jaar ontsluit is en só verdere stukrag aan sy klassieke vormingsideaal gee. Só sê Marthinus Visser, die instelling se besturende direkteur.

Die wese van die klassieke universiteitsidee – wat ook as Akademia se vormingsideaal bekend staan – word saamgevat in die strewe na die ware, die goeie en die skone in en deur die beoefening van die wetenskap. Visser verduidelik dat dié ideaal deur die instelling se akademiese lewe nagestreef word en dat dit as ʼn bepalende rigtingwyser dien wat alle aspekte van Akademia se bestaan toelig. “Ons is opgewonde oor die moontlikhede wat op ons wag in die nuwe jaar en die Akademia-gemeenskap is oorgehaal om as ʼn toegewyde Afrikaanse studietuiste deur voortgesette uitnemendheid diensbaar aan die gemeenskap te wees,” sê Visser. Hierdie diensbaarheid spreek volgens hom tot die instelling se aard en wese as verantwoordbare rentmeester met die oog op ʼn vrye toekoms.

“Akademia het in 2024 verskeie gróót en betekenisvolle tree geneem en daar is nougeset gewerk om doelwitte oor verskeie terreine te verwesenlik. Óf dit nou die uitbouing van ons akademiese programaanbod, die vestiging van nuwe studentelewetradisies, geografiese uitbreidingsgeleenthede óf die groei van personeel- en studentegetalle was, die standaard is hoog gestel en die grondslag is gelê vir selfs groter impak,” verduidelik Visser.

Gedienstig aan die instelling se jaartema, Afrikaans én tuis, meen Visser dat Akademia vanjaar sy kultuur van tuiswees nie net met passie verder gaan uitbou nie, maar ook gaan koester en vier. Hierdie tuiswees neem gestalte aan in onder meer die instelling se posisionering binne die Afrikaanse universiteitswese, navorsing, studentelewe, kuns en kultuur sowel as sy diensbaarheid tot die Afrikaanse taal- en kultuurgemeenskappe. Visser voeg by dat die instelling vanjaar sy dertiende jaar van klasgee betree, en lig die volgende hoogtepunte vir die jaar uit:

• Nuwe akademiese programme wat vanjaar vir die eerste keer aangebied sal word sluit onder meer in BA (Taalstudies), BCom (Rekeningkunde), BAHons (Media en Kommunikasie), sowel as die Nagraadse Diploma in Skoolleierskap en -bestuur.
• Verskeie nuwe programme – voorgraads én nagraads – word vir al vyf die fakulteite in die vooruitsig gestel, en daar word hard agter die skerms gewerk in terme van die onderskeie akkreditasieprosesse. Die instelling wag voorts tans op die akkreditasieuitslag van verskeie programme.
• As ʼn trots-Afrikaanse hoëronderwysinstelling neem Akademia vanjaar deel aan die #Afrikaans100-veldtog deur onder meer ʼn toegewyde jaartema, pasgemaakte studenteaktiwiteite én deelname aan verskeie nasionale en plaaslike gebeurlikhede.
• ʼn Rekordgetal van méér as 500 studente sal vanjaar suksesvol hul kwalifikasies aan Akademia verwerf by die jaarlikse kwalifikasieplegtigheid.
• Alhoewel die instelling se aansoeke vir die 2025- akademiese jaar nóg nie gesluit het nie, is alle aanduiding dat ongeveer 3 800. Fonties vanjaar by Akademia gaan studeer – voltyds op kampus én nauurs oor afstand.
• Die instelling se nuutverkose alumnikomitee sal in 2025 die instelling se verbondenheidsverhouding met sy afgestudeerde studente versterk en uitbou.
• Die Toekomsbouerveldtog behou goeie momentum en gedurende 2025 sal daar veral aandag geskenk word aan ontwerpsontwikkeling, massagrondwerke en kapitaalwerwing vir die projek.
• Akademia se Wes-Kaap-droom om in 2026 ʼn satellietkampus in die Paarl te vestig, vorder volgens plan. ʼn Geskikte fasiliteit is reeds geïdentifiseer en daar word hard aan die inrigting daarvan gewerk. Hou hierdie spasie dop vir verdere vestigingsnuus.
• Die instelling se bruisende studentelewe word in 2025 voortgesit en uitgebou en die jaar het op ʼn hoogtepunt begin met die grootste eerstejaarskamp nóg. Méér as 400 nuwe Fonties het die kamp bygewoon. ʼn Dinamiese studentelewekalender word vir die jaar in die vooruitsig gestel.
• Akademia se personeelkorps groei doelgerig. Die huidige personeelgroep bestaan uit 193 voltydse, 27 vastetermyn- en 25 deeltydse personeel.
• As ʼn klassieke en Christelike hoëronderwysinstelling is Akademia ʼn universitêre ruimte wat in die Christelike geloof geanker is. Hierdie geloofsbelewenis gaan vanjaar prakties uitgeleef word, in lyn met die vormingsideaal, by wyse van kapeldienste, Bybelstudiegeleenthede en oop gesprek-aande oor geloof.
• Die Groot Boeke-projek gaan van krag tot krag en studente en personeel sal vanjaar wéér saam lees aan die Groot Boeke vanuit ons tradisie. Hierdie tekste help ons dink oor die moeilike vrae van ons tyd.

• Die instelling se eerste mentorskapsprogram skop vanjaar af en het dit ten doel om ʼn brug, by wyse van ondersteuning en mentorskap, tussen akademie en praktiese vaardighede te slaan. Deelnemende studente sal ʼn pad saam met bekwane en gekeurde volwassenes stap om só deur gespreksvoering by te dra tot die vorming van die denke én die hart.

“As ʼn instelling is ons opgewonde oor 2025, en elke personeellid en student van Akademia is daartoe verbind om op ʼn lewenskragtige manier ʼn tuiste te bied vir die Afrikaanse taal- en kultuurgemeenskappe. ʼn Tuiskoms wat spreek tot persoonlike betekenis, verbondenheid én ʼn gevoel van gemeenskap,” sluit Visser af.