Die Akademia-sakeplankompetisie, ʼn opwindende inisiatief vanuit die instelling se BCom (Ondernemingsbestuur)-program, word vanjaar weer aangebied en spog op die koop toe met ʼn splinternuwe baadjie. Vanjaar se kompetisie sal oor drie kategorieë beslis word, en lede van die publiek sal vir die eerste keer hul sakevernuf in dié kompetisie op die proef kan stel. Aansoeke vir dié kompetisie open op Maandag 14 Julie.

Die doel van die kompetisie is om, gedagtig aan die instelling se vormingsideaal, praktiese uitvoering te gee aan die ontwikkeling van deelnemers se denke én hart wat die hedendaagse besigheidsmilieu betref. Binne hierdie roepingstaak, sal deelnemers vanjaar in die volgende kategorieë kan deelneem:

• Akademia-studente met ʼn nuwe ondernemingsdroom of -konsep wat nog nie in die bedryfsfase is nie;
• Akademia-studente wat reeds ʼn bestaande onderneming bedryf met ʼn bestaansgeskiedenis van tussen een en vier jaar; en

• Lede van die publiek wat reeds ʼn gevestigde besigheid vir die afgelope een tot drie jaar bedryf.

Behalwe vir die doelgerigte fokus op die ontwikkeling en gebruik van effektiewe sakeplanne, sal deelnemers voorts kan baat vind by akademiese en praktiese mentorskap deur kundige akademici en bewese entrepreneurs. Nóg ʼn gróót trekpleister van dié kompetisie, wat reeds sedert 2018 suksesvol aangebied word, is die waardevolle netwerkgeleenthede wat dit aan betrokkenes bied.

Só vier en bevorder Akademia entrepreneurskap

Volgens dr. Rachel Maritz, dekaan: Fakulteit Ekonomiese en Bestuurswetenskappe, breek Akademia met dié kompetisie ʼn betekenisvolle lansie nie nét vir die besigheidsektor in geheel nie, maar spesifiek vir entrepreneurs. Sy meen voorts dat die uitbreiding van die kompetisie, om nou ook vir die publiek ʼn geleentheid te bied, spreek op ʼn opwindende manier tot die instelling se gemeenskapsverbondenheid. “Die kompetisie bied aan alle deelnemers die kans om waardevolle netwerke te bou en skouers te skuur met ʼn uiteenlopende groep entrepreneurs met verskillende belange, kennisvelde en besigheidservaring,” sê Maritz en voeg by dat hierdie skakeling die vorm van ondersteunende netwerke, mentorskap, advies, marktoegang asook emosionele bystand kan aanneem.

Op die vraag waarom entrepreneurskap soveel méér as net ʼn gewilde gonswoord is, antwoord Maritz dat entrepreneurs werkskepping aanvuur en grootliks tot plaaslike ekonomiese groei bydra. Hierbenewens versterk entrepreneurs gemeenskapsbande deur lewensvatbare besighede te vestig wat geskoei is op onderlinge lojaliteit en volgehoue ondersteuning. “ʼn Wenpreneur is iemand wat waardegedrewe, toegewyd en kreatief nie nét eie wins en voordeel nastreef nie, maar eerder daarop fokus om ʼn betekenisvolle verskil te bewerkstellig,” sê Maritz.

Skryf só in

Die aanlyn aansoekproses, wat via die Akademia-webblad geskied, is op só ʼn manier saamgestel dat deelnemers maklik deur elke stap kan navigeer. Die proses behels drie maklike stappe:

• Klik hier vir die inskrywingsvorm.
• Kies die toepaslike kategorie waarvoor jy wil inskryf en maak seker dat jy aan die gestelde inskrywingsvereistes voldoen. En maak seker dat jy jouself van die bepalings en voorwaardes

• Laai jou sakeplan (in PDF-formaat) op.

Deelnemers moet ook kennis neem van die volgende belangrike datums:

• 14 Julie – Inskrywings open
• 31 Julie – Inskrywings sluit
• 18 Augustus – Aankondiging van die topdriefinaliste in elke kategorie

• 28 Augustus – Die finale ronde en die aankondiging van die wenners

Die beoordelaarspaneel sal gevolglik die topdriefinaliste in elke kategorie aanwys, waarna die finale ronde by die instelling se Leriba-kampus in Centurion sal plaasvind. Tydens hierdie geleentheid sal die deelnemers ʼn sakeplanaanbieding doen waarna die wenners bekendgemaak sal word.

Die wenbesigheid van die 2024-kompetisie, Avo Guy, gaan ʼn jaar ná die kompetisie steeds van krag tot krag en die wenners, Willem en Louis Albertyn, meen dié kompetisie was die wegspringplek vir hul sukses. Die broers moedig deelname aan die kompetisie aan en motiveer deelnemers om só doelgerig vorm aan hul toekomsdrome te gee.