Musiekblyspel - Daai kleindorpiegevoel

Akademia maak vanjaar trots sy buiging op die teaterverhoog met die Afrikaanse studentemusiekblyspel,

Daai kleindorpiegevoel, ŉ hartroerende verhaal van selfontdekking, liefde en gemeenskap.

3 tot 10 Oktober 2026

3-10 Oktober 2026

Centurion Teater

Konsep en storielyn: Johan Vorster en Jacomien de Wet van Inhoud Huis Musiek

Teks en regie: Jannes Erasmus

Musiekverwerkings en -regie: Arnold de Wet en Johan Vorster

Die musiekblyspel word vervaardig deur Inhoud Huis Musiek, die dryfveer agter geliefde treffers soos Semi-Soet, Die kaplyn, Ons vir jou, Die gelofte en Die Afrikaner maak só.

Wanneer Pieter se motor buite die klein dorpie Stofpan teëspoed gee, het hy géén idee dat drie weke op Tannie Pompie se plaas sy hele lewe onherroeplik gaan verander nie. Wat begin het as ŉ noodgedwonge wegbreek, ontvou gou in ŉ ontdekkingsreis gevul met romanse en tekenend van menswees. Tussen eksentrieke dorpenaars, ŉ bok met ŉ persoonlike vendetta, plaasuitdagings en ou liefdes wat weer opvlam, leer Pieter dat die belangrikste dinge in die lewe nie gekoop kan word nie.

Jy sien, Stofpan, is allesbehalwe stil. Terwyl ŉ slinkse burgemeester sy oog op meer as net Tannie Pompie se plaas het, moet Pieter besluit: Keer hy terug na die lewe wat hy ken óf waag hy die een wat hy nooit sien kom het nie?

OP DIE PLANKE IN

DAE

URE

MIN

ONTMOET DIE HOOFKARAKTERS

Keynan Fox

as Pieter, die stadsjapie

Keynan Fox (22) is ŉ finalejaarstudent in die BCom (Ekonomie en Regte)-program aan Akademia se Pretoria-kampus. Fox, wat sy skoolloopbaan aan die Hoërskool Merensky in Tzaneen voltooi het, was gedurende sy eerste twee jaar van studie ŉ inwoner van die manskoshuis, Huis Magalies.

Abigail de Villiers

die boerenooi

Abigail de Villiers (21) is ŉ derdejaarstudent in die LLB-program, en sy pak haar studie by wyse van Akademia se nauurse afstandsmodel aan. Dié gebore en getoë Pretorianer het haar skoolloopbaan aan die Hoërskool Garsfontein voltooi.

Edo Collyer

as Ronnie Bester

Edo Collyer (23) is ŉ student in die BCom (Ondernemingsbestuur)-program en pak sy studie by wyse van Akademia se nauurse afstandsmodel aan. Hy het sy skoolloopbaan aan die Hoërskool Wagpos in Brits voltooi en was vir twee jaar lank ŉ inwoner van die manskoshuis, Huis Magalies.

Zandré Gower

as Oom Bert, die motorwerktuigkundige

Zandré Gower (20) is ŉ derdejaarstudent in die BA (Kommunikasie en Joernalistiek)-program aan Akademia se Pretoria-kampus. Dié oudinwoner van die manskoshuis, Huis Hennops, het sy skoolloopbaan aan die Hoërskool Wagpos in Brits voltooi.

Martin Munro

as Marno, die jaloerse ekskêrel

Martin Munro (22) is ŉ vierdejaar-LLB-student en pak sy studie by wyse van die instelling se nauurse afstandsmodel aan. Hy het sy skoolloopbaan aan die Hoërskool Jeugland in Kempton Park voltooi en is tans ŉ lid van die mansdaghuis, Huis Karoo.

André Smit

as Spanner

André Smit (20) is ŉ tweedejaarstudent in die BCom (Ekonomie en Regte)-program aan Akademia se Pretoria-kampus. Hy is ŉ trotse lid van die mansdaghuis, Huis Karoo. Dié boorling van Centurion is geen vreemdeling vir die verhoog nie en neem reeds elf jaar lank aan verskeie produksies deel.

Tristin Minni

as Tjokkie

Tristin Minnie (21) is ŉ tweedejaarstudent in die BCom (Ondernemingsbestuur)-program en pak sy studie by wyse van die instelling se nauurse afstandsmodel aan. Hy het sy skoolloopbaan aan die Hoërskool Oosterlig in Boksburg voltooi. Hoewel hy nie meer in ŉ koshuis woon nie, was hy voorheen ŉ trotse inwoner van Huis Magalies.

Veronique le Roux

as Tannie Pompie die weduwee met die haelgeweer

Veronique le Roux (19) is ŉ tweedejaarstudent in die BCom (Ondernemingsbestuur)-program aan Akademia se Pretoria-kampus. Sy het haar skoolloopbaan aan die Teneo Online School South Africa voltooi en dié boorling van Randfontein is ŉ trotse lid van die damesdaghuis, Huis Daglelie.

STUDENTE DRUK HUL STEMPEL AF

Daai kleindorpiegevoel is een van min Afrikaanse musiekblyspele in die laaste jare wat op hoëronderwysvlak aangebied word en die hele produksie word deur studente gedra – van die rolverdeling tot die tegniese aspekte.

IN HUL EIE WOORDE

“Dit gaan nie altyd oor die mees professionele sangers of akteurs nie, maar oor die regte groep om die legkaart mee te bou. Ons is oortuig daarvan dat ons daardie wenkombinasie gevind het.”

– Johan Vorster, kreatiewe direkteur: Inhoud Huis Musiek

“Omdat dit my finale jaar by Akademia is, voel hierdie musiekblyspel soos ŉ wonderlike afsluiting van my naskoolse verhoogloopbaan. Om saam met professionele kenners te werk, is ŉ ongelooflike leergeleentheid.”

– Keynan Fox, vertolk die rol van Pieter

“Ek wil hê gehore moet spontaan kan lag, verlief raak op Stofpan en sy mense, en met ŉ warm hart huis toe gaan. Dit is propvol humor, romanse en musiek wat lank ná die ligte uitgedoof het, by jou sal bly.”

– Jannes Erasmus, produksieregisseur

VOORSMAKIE

ARTIKELS

Akademia se eie Afrikaanse studentemusiekblyspel eersdaags op die planke

BORGE EN VENNOTE

REGISTREER VIR ONS NUUSBRIEF EN BLY OP HOOGTE MET AKADEMIA SE NUUS EN GEBEURE

3 tot 10 Oktober 2026

3-10 Oktober 2026

Centurion Teater