Die BAHons (Media en Kommunikasie) gee aan studente die geleentheid om in Strategiese Kommunikasiebestuur óf Joernalistiek te spesialiseer. In albei strome word die dinamiese verhouding tussen teorie en praktyk deurgaans beklemtoon, sodat afgestudeerde studente nie bloot vaardig is nie, maar ook krities kan besin oor die media- en kommunikasiebedryf om sinvolle en positiewe bydraes te maak.

Benewens die klem op teoretiese kennis en praktiese en bedryfsgerigte vaardighede, fokus die program ook op die ontwikkeling van vaardighede wat media- en kommunikasiepraktisyns nodig het om in die 21ste eeu in die werkplek te funksioneer, soos digitale en datageletterdheid, die vermoë om doeltreffend te kommunikeer, saam te werk oor dissiplines heen, kritiese en sosio-emosionele vaardighede, asook die vermoë om komplekse inligting te verwerk en ʼn hoë kognitiewe werklading te bestuur.

Indien jy daarin belangstel om die program in 2026 voltyds by die Pretoria-kampus te studeer, woon die interaktiewe aanlyn inligtingsessie op Donderdag 16 Oktober 2025 om 17:30 by.