Aansoeke vir Akademia se 2026- akademiese jaar open op 1 April 2025 en voornemende Fonties* word aangemoedig om solank die nodige dokumentasie bymekaar te kry en só vlerke aan hul naskoolse studiedrome te gee. Nóg goeie nuus is dat die instelling vanjaar weer, soos verlede jaar die geval was, akademiese merietebeurse aan goed presterende matrikulante gaan bied.

Volgens Liana van Rooy, Akademia se registrateur, het die instelling ʼn totaal van R1,9 miljoen aan merietebeurse aan 323 Fontie-eerstejaars vir die 2025- akademiese jaar toegeken. Die grootste individuele toekenning het ʼn bedrag van R30 000 beloop wat teen klasfooie en koshuisfooie gekrediteer is. Hierdie uitbetalings is moontlik gemaak deur bydraes tot die Akademia-skenkingsfonds.

“Alhoewel die vooruitsig van hoër onderwys met groot opwinding gepaard gaan, is dit ʼn realiteit dat die hoë koste hiervan swaar rus op die skouers van voornemende skoolverlaters en hul ouers,” meen Van Rooy. In die lig hiervan bied die instelling se akademiese merietebeurs hoop vir die 2025-matriekklas omdat ʼn voornemende student ʼn merietetoekenning van maksimum R50 000 op hierdie manier kan geniet. Hierdie toekenning sal gevolglik in die vorm van studiekorting vir onderskeidings in drie kategorieë toegeken word, en sal outomaties teen klasfooie of koshuisfooie gekrediteer word vir die eerste jaar van studie aan Akademia. Dit is voorts belangrik om daarop te let dat die akademiese merietebeurse van toepassing is vir studie op beide die instelling se onderrigleermodelle, naamlik die voltydse kampusmodel en die nauurse afstandsmodel. Van Rooy is veral opgewonde oor die studiegeleenthede wat hierdie toekenning vir studente in die Wes-Kaap gaan ontsluit met die opening van die instelling se Paarl-kampus in 2026.

Die korting sien as volg daaruit:

• Kategorie A-vakke: R8 000 per onderskeiding

Wiskunde, Fisiese Wetenskappe en Lewenswetenskappe

• Kategorie B-vakke: R4 000 per onderskeiding

Afrikaanse Huistaal, Afrikaans Eerste Addisionele Taal, Engels Huistaal, Engels Eerste Addisionele Taal en Rekeningkunde

• Kategorie C-vakke: R2 000 per onderskeiding

Alle ander skoolvakke, Lewensoriëntering uitgesluit

Die toekenning van die merietebeurse is onderhewig aan bepaalde bepalings en voorwaardes waarvan deeglik kennis geneem moet word.

“Harde werk word beloon, en die toekenning van hierdie akademiese merietebeurse is sprekend hiervan. As ʼn instelling hoop ons dat hierdie vooruitsig matrikulante opgewonde oor hul toekoms sal maak, en dat hulle op hierdie manier gestalte aan hul roepingsbesef sal gee,” meen Van Rooy.

Akademia wens die 2025-matriekklas alle sterkte toe met hul voorbereiding tot die aanloop van die eindeksamen.

* Fonties verwys na studente wat aan Akademia studeer. Dié eienaam is afgelei uit die instelling se leuse, Ad futurum per fontes – na die toekoms deur die bronne.