Vakante poste
Fakulteit Natuurwetenskappe
Akademia is ʼn Christelike, klassieke en onafhanklike hoëronderwysinstelling wat verbind is tot die uitnemende opleiding en vorming van studente. Akademia het tans ʼn voltydse pos in Centurion vir die departementshoof van Wiskundige Wetenskappe, in die Fakulteit Natuurwetenskappe beskikbaar. Om vir die pos te kwalifiseer moet ʼn kandidaat oor ʼn doktorsgraad in minstens een van die deeldissiplines in Wiskundige Wetenskappe beskik asook oor ʼn sterk akademiese en navorsingsrekord. Die kandidaat moet verder beskik oor vyf jaar se ervaring in hoër onderwys en bestuur asook ʼn goeie begrip van die akademiese deeldissiplines in dié departement. ʼn Kandidaat wat slegs oor ʼn verwante meestergraad beskik sal oorweeg word vir die pos, mits die kandidaat voldoen aan die res van die vereistes gestel en oor besondere bestuursvaardighede en -bekwaamhede vir so ʼn bestuurspos beskik.
ʼn Departementshoof is verantwoordelik vir die bestuur en die oorhoofse toesig van programme binne ʼn bepaalde departement se vakgebied(e). Verder is die departementshoof verantwoordelik daarvoor om sterk akademiese leierskap te toon en te bevorder in sy departement. Die departementshoof moet die dekaan van ʼn bepaalde fakulteit ondersteun in die uitvoering van strategieë binne in die fakulteit.
Daar sal ook van die departementshoof verwag word om die betrokke dissiplines in die departement strategies binne Akademia en in die breër hoëronderwysgemeenskap te vestig in samewerking met die dekaan; die departement te vorm om toekomsgerig te wees; akademiese inhoude van programme, onderrig- en leerprosesse asook leerervaringe van studente te bestuur; die uitvoering van prosesse rakende akademiese aktiwiteite te moniteer in samewerking met die dekaan en programkoördineerders; deurlopende uitvoering van departementele strategieë en doelwitte te verseker en insette op die roetekaart vir die departement in samewerking met die betrokke dekaan, te lewer.
Die departementshoof moet ook voldoening aan standaard- operasionele prosedures asook beleide en standaarde van die instelling verseker; ʼn gehalte georiënteerde klimaat in samewerking met die dekaan bevorder; in samewerking met die dekaan en die betrokke afdeling(s), prosesse van Personeel en Ontwikkeling in die departement, soos dissiplinêre prosesse, opleiding, werwing, ens. te beplan en bestuur.
Die kandidaat moet kennis van Akademia en van die hoëronderwysomgewing in die algemeen hê en moet onder andere oor die volgende beskik: ʼn opvoedingsingesteldheid; goeie leierskap en bestuursvaardighede; die vermoë om konstruktief met mense om te gaan; uitstekende kommunikasievaardighede, interpersoonlike en konflikhanteringsvaardighede; probleemoplossingsvaardighede; die vermoë om mededingende eise te hanteer; uitstekende delegeringsvaardighede; buigsaam en aanpasbaar by veranderende omstandighede; in staat wees om hul vaardighede te ontwikkel en advies vanuit verskillende bronne te aanvaar; die vermoë om prosesse te ontwikkel en te implementeer; asook ʼn positiewe ingesteldheid met dryfkrag, motivering en inisiatief.
Klik hier om vir die pos aansoek te doen. Aansoeke moet voor of op 22 April 2024 ingedien word. Stuur ʼn e-pos na personeelnavrae@akademia.ac.za en heg jou Afrikaanse CV daarby aan indien jy probleme met die skakel ervaar.
Akademia is ʼn Christelike, klassieke en onafhanklike hoëronderwysinstelling wat verbind is tot die uitnemende opleiding en vorming van studente vanuit en vir die Afrikaanse taal- en kultuurgemeenskappe. Akademia het ʼn deeltydse pos vanaf 1 Julie 2025 in Centurion vir ʼn dosent in Wiskundige Statistiek in die Fakulteit Natuurwetenskappe beskikbaar. Om vir die pos in aanmerking te kom moet ʼn kandidaat oor ʼn meestersgraad beskik en een tot drie jaar se ervaring in hoër onderwys is ʼn verdere voorvereiste vir die posisie. Ervaring in kontakonderrig, blootstelling aan en vorige gebruik van onderwystegnologie, kennis van en kundigheid in die elektroniese onderrig-en-leer-omgewing, ervaring in die ontwikkeling van studiemateriaal sal voordelig wees.
Daar sal van die posbekleër verwag word om lesings op die Leriba-kampus in Centurion te behartig. Die dosent sal ʼn spektrum van akademiese en verwante take verrig, wat onder andere insluit die voorbereiding en dosering van die inhoud, die opstel van assesseringsaktiwiteite in ʼn kontakleeromgewing, en die lewering van bystand en akademiese ondersteuning aan studente.
Die ideale kandidaat vir hierdie pos moet oor sterk verbale en geskrewe kommunikasievaardighede; interpersoonlike vaardighede; priorisering- en tydsbestuursvaardighede beskik; sowel as onafhanklik in ʼn spanverband kan funksioneer; inisiatief kan neem; oplossingsgedrewe wees; oor ʼn vermoë beskik om werk onder druk te voltooi; ʼn liefde vir Afrikaans hê; en as ambassadeur vir Akademia help om die instelling uit te bou
Klik hier om vir die pos aansoek te doen. Aansoeke moet voor of op 24 April 2025 ingedien word. Stuur ʼn e-pos na personeelnavrae@akademia.ac.za en heg jou Afrikaanse CV daarby aan indien jy probleme met die skakel ervaar.
Administrasie
Akademia is ʼn Christelike, klassieke en onafhanklike hoëronderwysinstelling wat verbind is tot die uitnemende opleiding en vorming van studente vanuit en vir die Afrikaanse taal- en kultuurgemeenskappe. Akademia het tans twee administrateursposte in die Administrasie-afdeling beskikbaar.
Om vir hierdie pos te kwalifiseer moet die kandidaat oor ʼn nasionale sertifikaat en of diploma (NKR-vlak 6) in Kantooradministrasie, Sekretariële- of Projekbestuur beskik. Ervaring in MS Office-pakkette is ʼn voorvereiste vir die pos, terwyl ervaring in studenteadministrasie, Moodle, aanlyn eksamens, datavaslegging en kliëntediens voordelig sal wees.
Verantwoordelikhede sluit in: opstel en implementering van die assesseringsplan vir die akademiese jaar, administrasie en verwerking van semestertoets- en jaarpunte, asook die saamstel en bywerking van studenterekords. Die suksesvolle kandidaat sal ook daarvoor verantwoordelik wees om algemene studentenavrae ten opsigte van assesserings te beantwoord, integriteit van punte en eksamens te moniteer, en nou saam te werk met die fakulteite asook die koördineerder van akademiese administrasie.
Die ideale kandidaat sal onderskei word deur sterk spanwerk en kommunikasievaardighede; goeie menseverhoudinge te handhaaf, die vermoë om tyd te bestuur; uitstekende administratiewe en organisatoriese vaardighede; prioritiserings- en beplanningsvaardighede; die vermoë om onder druk aan sperdatums te voldoen; asook tegniese vaardighede om data in te samel en te verwerk.
Klik hier om vir die pos aansoek te doen. Aansoeke moet voor of op 25 April 2025 ingedien word. Stuur gerus ʼn e-pos na personeelnavrae@akademia.ac.za indien jy probleme met die skakel ervaar.
Personeel en Ontwikkeling
Akademia is ʼn Christelike, klassieke en onafhanklike hoëronderwysinstelling wat verbind is tot die uitnemende opleiding en vorming van studente. Akademia het tans ʼn voltydse pos in Centurion vir ʼn administrateur, in die Personeel en Ontwikkeling-afdeling beskikbaar. Om vir die pos te kwalifiseer moet ʼn kandidaat oor ʼn toepaslike nasionale diploma of gevorderde diploma in Kantooradministrasie, Sekretariële of Projekbestuur beskik. Drie tot vyf jaar ervaring in operasionele administrasie is ʼn voorvereiste vir die pos, terwyl ervaring in die menslikehulpbronprosesse, asook personeelstelsels en algemene kantoorbestuur in die ideale kandidaat se guns sal tel, maar nie noodsaaklik is nie.
Daar sal van die posbekleër verwag word om ʼn wye spektrum van administratiewe take te verrig met betrekking tot algemene werwing- en keuringprosesse, die bywerking en instandhouding van personeelverwante stelsels, bystand met inisiatiewe rakende Personeel en Ontwikkeling-projekte, aanstellings- en uittredeprosesse, asook algemene administrasie en die verlening van bystand aan die organisasieontwikkelingspan. Verantwoordelikhede sal onder andere insluit, die plasing van advertensies, skakel van potensiële kandidate, skeduleer van onderhoude, raadsaalbesprekings, die verskaffing van inligting oor die status van kandidate se aansoeke en die bywerking van personeelstelsels. Die suksesvolle kandidaat sal in noue samewerking met die beamptes van die afdeling effektiewe prosesse verseker.
Die ideale kandidaat sal onderskei word deur uitmuntende administratiewe vaardighede, uitstekende interpersoonlike en kommunikasievaardighede, sterk probleemoplossingvaardighede, energie en ywer, organiserings- en koördineringsvaardighede, vermoë om onafhanklik en binne ʼn span te werk, inisiatief aan die dag lê, goeie tydsbestuur en prioritiseringsvermoë, deursettingsvermoë, rekenaarvaardighede, die vermoë om onder hoë druk te funksioneer, en ʼn oog vir detail.
Klik hier om vir die pos aansoek te doen. Aansoeke moet voor of op 30 April 2025 ingedien word. Stuur ʼn e-pos na personeelnavrae@akademia.ac.za en heg jou Afrikaanse CV daarby aan indien jy probleme met die skakel ervaar.
REGISTREER VIR ONS NUUSBRIEF EN BLY OP HOOGTE MET AKADEMIA SE NUUS EN GEBEURE
