Hierdie module het ten doel om studente se begrip van ekonomie te verdiep deur te demonstreer waarom bepaalde gebeurtenisse in die ekonomiese stelsel plaasvind. Ten einde hiervan word daar op intermediêre makro- en mikro-ekonomie gefokus.

In hierdie module word daar gefokus op hoe die dissipline van ekonomie ontwikkel het. Hiervoor waar daar veral op prominente ekonomiese denkers gefokus, waardeur die student se vermoë om te besin ook verbreed word deur blootstelling aan verskillende – en soms uiteenlopende – ekonomiese denkskole.

In hierdie module word daar voortgebou op die voorgaande inleiding tot filosofie. Daar word steeds histories en sistemies te werk gegaan, maar met ʼn fokus op die begrip van moderne en politiese filosofie. Die moderne been sluit in Machiavelli, Descartes, en figure uit die Britse, Franse en Duitse Verligting. Met betrekking tot politieke filosofie word studente blootgestel aan verskeie politiese denkers.

Hierdie module verdiep studente se kennis van internasionale betrekkinge deur toespitsing op twee belangrike onderwerpe, naamlik internasionale organisasies en die ontleding van buitelandse beleide. By die bestudering van internasionale organisasies word daar veral gefokus op die netwerk van interregeringsorganisasies wat transaksies tussen lande reguleer, asook die veranderende gesig van internasionale betrekkinge in die lig van die Brexit-referendum en die verkiesing van Donald Trump. Met betrekking tot die ontleding van buitelandse beleid word studente blootgestel aan die plaaslike en internasionale kragte wat hierdie beleide beïnvloed.

In hierdie voortsetting van Politiek 1 word daar in die besonder gekyk na politieke teorie en vergelykende politiek. Die studie van politieke teorie verbreed studente se bestaande kennis van politiese teorieë, konsepte en modelle vanuit ʼn verskeidenheid perspektiewe, terwyl vergelykende politiek die student in staat stel om ʼn breër benadering tot politiese gebeure te neem en dit nie bloot in isolasie te ontleed nie. Hierdie module bemagtig studente om politiek as ʼn wetenskap te benader wat sistematies op politieke probleme toegepas kan word.

In die module oor die politieke filosofie word gefokus op ’n sentrale polities-filosofiese verdelingslyn van die moderne era, naamlik die verskil tussen die klassieke liberale en klassieke konserwatiewe denke. In die besonder word gefokus op die ontstaan van die polities-filosofiese verdeling tussen ‘regs’ en ‘links’ by monde van twee vooraanstaande politieke denkers van die moderne era, naamlik Edmund Burke en Thomas Paine. In die hart van die module staan die Franse Rewolusie uit die agtiende eeu en die uiteenlopende wyse waarop Burke en Paine daarop antwoord.

Die module in politieke filosofie rus op die vooronderstelling dat genoemde polities-filosofiese verdelingslyne steeds ten grondslag van toonaangewende debatte in die hedendaagse politieke filosofie lê. ’n Begrip van dié hedendaagse debatte is onmoontlik sonder om Burke en Paine se uiteenlopende antwoorde te verreken.