Akademia as ʼn gemeenskapsinstelling het dit ten doel om by uitstek diensbaar te wees aan die onderskeie gemeenskappe waarin die instelling funksioneer. Gedagtig hieraan het dosente* verbonde aan die Fakulteit Opvoedkunde aan die einde van Januarie ʼn opleidingsgeleentheid in Mpumalanga aangebied wat op mentorskapsvaardighede vir jong skoolleiers gefokus het.

Volgens Marizahn Wentzel, dosent: Professionele Studies, en Nadia Herbst, koördineerder: Werkgeïntegreerde leer – wat ook as fasiliteerders opgetree het, het die opleiding dit ten doel gehad om senior skoliere van Hoërskool Middelburg as mentors toe te rus en só hul leierskapsvaardighede uit te brei. Dié leiers word onder meer getaak om as mentors op te tree vir die skool se nuwe groep graad 8-leerlinge vir wie die hoërskoolervaring nuut en onbekend is. Aspekte waarmee dié nuwelinge veral leiding benodig sluit onder meer in goeie gewoontevorming, verhoudingsaangeleenthede, selfregulering, effektiewe tydsbestuur, en konflikhantering. Nóg ʼn belangrike gesprekspunt was die verantwoordelike en effektiewe gebruik van sosiale media en slimfoontoepassings. Laasgenoemde verwys veral na toepassings wat studiehulpmiddels en tydsbestuurswenke bied.

Alhoewel die konsep van mentorskap nie ʼn nuwe tendens is nie, meen Wentzel en Herbst dat vaardigheidsopleiding hierin, veral vir skoolgaande leerders, van kardinale belang is as gevolg van die lewensveranderende aard daarvan. Behalwe vir die opleiding met die leerder-mentors het die Akademia-kundiges ook ʼn ondersteunende werkboek daargestel waarvan die inhoud oor ʼn periode van ses weke met die graad 8-leerlinge deur die skoolleiers deurgewerk gaan word.

“Die vermoë om ʼn mentor te wees, is ʼn karaktereienskap, maar ook ʼn kritiese vaardigheid, waaroor leiers op welke vlak van invloed oor moet beskik,” meen Wentzel. Op haar beurt voeg Herbst by dat mentorskapsopleiding en -vaardighede waardevolle toevoegings is op enige individu se reis as lewenslange en toekomsgerigte leerder.

*Die Akademia-afvaardiging het bestaan uit Wentzel, Herbst, Susan O’Reilly (departementshoof: Opvoedkundestudies) en Jhani Pottas (dosent: Opvoedkundestudies).