Sedert die ontstaan van die Akademia-koor in Augustus 2021 het dié musikale ensemble nie net reeds tientalle gehore bekoor nie, maar óók verskeie hoogtepunte bereik. Een só ʼn hoogtepunt is die samestelling van die eerste koorkomitee in Meimaand vanjaar.

Volgens Mariska Bolleurs, koördineerder: Studentesake by Akademia, het die nuutgevonde koorkomitee, wat uit dienende koorlede bestaan, dit ten doel om die instelling se vormingsideaal verder te ondersteun. “Akademia streef daarna om te verseker dat studente tot verantwoordbare roepingsgedrewe individue gevorm word, en in die lig hiervan speel leierskapsvaardighede ʼn belangrike rol,” verduidelik Bolleurs. Sy voeg by dat deur hulself verkiesbaar te stel vir die komitee, koorlede die geleentheid het om ʼn aktiewe rol in die ontwikkeling en gepaardgaande bestuur van die Akademia-koor te speel.

“Die Akademia-koor vorm nie net deel van die ritmiese hartklop van die instelling se bruisende studentelewe nie, maar spreek óók tot die klassieke universiteitskultuur,” meen Bolleurs. Sy voeg by dat die samestelling van die komitee op só ʼn wyse gedoen is dat dit die veelsydige aard van die koor sal komplimenteer.

Derhalwe vir ondersteuning aan die koor, slaan die komitee voorts ʼn brug tussen die instelling se Studentesake-afdeling en die groter studentegemeenskap. In die vervulling van hierdie doelwitte sal die komitee betrokke wees by die reël van spesiale geleenthede, die insameling van fondse, skakeling met eksterne netwerke, die oorkoepelende bemarking van die koor asook die verdieping van die bestaande koorkultuur.

Die volgende portefeuljes word in die komitee vervat:

• Bemarking, Gerda Bredenkamp
• Finansies, Henry Smith
• Funksies, Jan-Albert Smit
• Sosiaal, Janco du Toit

• Voorsitter, Jenae Pietersen

Bolleurs voeg by dat twee bykomende lede as ondersteuning vir dié uitvoerende komitee aangewys is, naamlik Minette Vorster en Nadine Nel.

Meer oor die Akademia-koor

Die koor, onder leiding van die befaamde dirigent en komponeerder, Franco Prinsloo, het net minder as vier jaar terug met slegs twintig lede begin. Vanjaar spog die koor met 61 toegewyde koorlede.

Hoogtepunte op die koor se musikale kerfstok sluit onder meer in:

• Die eerste uitvoering van Akademia se universiteitslied, “Ad futurum per fontes” in 2022 wat opgevolg word deur ʼn professionele opname en video in 2023.
• Die insluiting van verskeie opnames, waaronder “Sonvanger” en “Voshaarnooi” as die mees onlangse toevoegings, op groot stromingsplatforms.
• Benoemings in 2024 vir beide ʼn Aitsa!-toekenning sowel as ʼn Legato-toekenning.
• ʼn Eerste voorportaalkonsert op Akademia se Gerhardstraat-kampus met die Afrikaanse sanger, Jannie du Toit.
• Deelname aan die instelling se eerste koorfees in die Paarl ter viering van Afrikaans se eeufeeswording. Tydens hierdie geleentheid sing die gemeenskap die Afrikaans100-koorlied, “ʼn Namagowab lied van die lier”, soos gekomponeer deur Prinsloo, vir die eerste keer saam.