Akademia se gebeurlikheidskalender vir die Wes-Kaap is propvol en daar heers groot opgewondenheid oor elkeen van hierdie gebeurlikhede, veral in die lig van die instelling se voorgenome uitbreiding na dié streek. Dié aankondiging is vroeër vanjaar gemaak, en daar word sedertdien hard aan die vestigingsproses gewerk om die deure van hierdie satellietkampus in 2026 in die Paarl te open.

Hierdie bedrywighede omvat méér as net die aktiwiteite by die bestaande sentrumnetwerk waar Fonties via die instelling se nauurse afsandsmodel studeer. Dié sentrums is in George, die Paarl en Somerset-Wes geleë.

Vlymskerpbesigheid in ʼn japtrap: Besigheidswerkswinkel en netwerkgeleentheid

Indien jy jouself in die Wes-Kaap bevind, én daarin belangstel om jou sakevaardighede op te skerp, dagboek Donderdag 7 November 2024. Op dié dag bied Akademia ʼn dinamiese besigheidswerkswinkel en netwerkgeleentheid aan. Die Vlymskerpbesigheid in ʼn japtrap-geleentheid is reeds met groot welslae in Bloemfontein, die Moot in Pretoria én Potchefstroom aangebied.

Tydens hierdie geleentheid sal die fokus op kennisverryking en professionele ontwikkeling val, en sal aangeleenthede soos finansies, bemarking en innovasie aandag geniet. Die volgende werkswinkels sal deur Akademia-dosente, as vooraanstaande kenners op hul onderskeie gebiede, aangebied word:

• Verskerp jou finansiële vaardighede deur Shaun Coetzee
• Inskerp van bemarkingsbeginsels deur Salomien Boshoff
• Opskerp van innovasie vir jou besigheid deur Johann Smith

Hierdie geleentheid sal plaasvind by Akademia se Paarl-sentrum (Historium) in Pastorielaan 11, Esterville vanaf 08:30 tot 17:00. Die koste beloop R450 per individuele kaartjie en daar is ʼn groepkorting beskikbaar teen R2 000 vir ʼn groepbespreking van vyf mense. Jou kaartjie sluit alle werkswinkels, ʼn netwerkgeleentheid, verversings en ʼn opleidingspakkie in. Om teleurstelling te voorkom, word jy vriendelik versoek om jou sitplek vroegtydig te bespreek deur jou kaartjie op Die Winkel aan te koop.

ʼn Besige geleentheidskalender

Volgens Mareli Swanepoel, bestuurder: Institusionele projekte en ondernemings by Akademia, is die instelling se Wes-Kaapse gebeurlikheidskalender propvol. Komende geleenthede sluit onder meer in ʼn kuiergeleentheid vir finalejaarstudente en alumni in dié streek, asook ʼn prestige-ontbyt vir sakelui, gemeenskapsleiers en onderwysers.

Hierbenewens is die instelling ook betrokke by die Vrouenetwerk en AfriForum Sakenetwerk se bedrywighede in die streek. Vroeër vanjaar is daar ook reeds ʼn baie suksesvolle sentrumopedag in George gehou asook ʼn studentesimposium en netwerkgeleentheid. Laasgenoemde is deur die Fakulteit Regsgeleerdheid in samewerking met die Solidariteit Regsnetwerk aangebied.

“As ʼn instelling is ons opgewonde oor ons uitbreiding na en verdere vesting in die Wes-Kaap, asook die toekomstige impak wat ons hier sal kan maak,” sluit Swanepoel af. Sy nooi belangstellendes om indien daar enige verdere navrae is, ʼn e-pos te stuur na akaprojekte@akademia.ac.za.