Akademia as onafhanklike Afrikaanse hoëronderwysinstelling vier gedurende 2025 nie net dertien jaar van klasgee nie, maar óók die trotse toevoeging van ʼn eerste meestersprogram tot sy uitgebreide program repertoire.

Die LLM deur navorsing-program word vanuit die Fakulteit Regsgeleerdheid aangebied en sal via die instelling se nauurse afstandsmodel gefasiliteer word. Aansoeke vir hierdie gevorderde navorsingsprogram vir 2025 sluit op 30 Junie  en belangstellendes kan via e-pos hieroor navraag doen.

Prof. Hermie Coetzee, dekaan van die fakulteit, verduidelik dat die LLM deur navorsing-program, wat op NKR-vlak 9 aangebied word, gesog is onder regsgeleerdes en is veral van toepassing op diegene wat:

• gereelde navorsing in die reg onderneem,
• ʼn belangstelling in regsnavorsing het,
• belangstel om ʼn loopbaan in ʼn gespesialiseerde geteikende veld te volg óf,

• wat ʼn loopbaan in die akademie in die vooruitsig stel.

Wat die aard van die program betref sal die fokus op akademiese opleiding en vaardigheidsontwikkeling by wyse van formele nauurse werkswinkels sowel as praktiese studieleiding val. Die suksesvolle voltooiing van dié program baan voorts die weg vir doktorale studie in die reg. Die minimum aanbevole tydsduur vir die voltooiing van die program is twee jaar, terwyl die maksimale tydsduur vir voltooiing op drie jaar gestel word.

Belangstellende studente sal aan ʼn streng keuringsproses onderwerp word wat ondermeer ʼn sterk akademiese rekord, ʼn aanvanklike navorsingsvoorstel en die beskikbaarheid van ʼn gepaste studieleier berus. In die lig hiervan sal toepaslike navorsingservaring tot ʼn voorgenome student se voordeel strek.

ʼn Lansie vir Afrikaanse as wetenskapstaal en vir regspleging in die geheel

Volgens Coetzee spreek die toevoeging van die LLM deur navorsing-program tot Akademia se roepingstaak om as ʼn Afrikaanse hoëronderwysinstelling die ontwikkeling en behoud van Afrikaans as wetenskapstaal te help verseker en doelgerig uit te brei. “In die lig hiervan is dit vir die Fakulteit Regsgeleerdheid ʼn groot eer om hierdie program aan te bied en só ʼn lansie vir Afrikaans as wetenskapstaal in die regswêreld te breek,” sê Coetzee. Sy voeg by dat navorsing in Afrikaans voorts nie net die Afrikaanse taal- en kultuurgemeenskappe dien nie, maar ook ʼn belangrike rol speel in die groter meertaligheidsmilieu van die regswêreld.

Die waarde van regsnavorsing mag volgens Coetzee nie onderskat word nie omdat dit regspleging asook regsopleiding versterk en ondersteun met die gevolg dat gemeenskappe direk daarby baatvind. “Wat bepaald die regsberoep betref is die vermoë om behoorlike navorsing te onderneem, ʼn onontbeerlike vaardigheid waaraan daar voortdurend geslyp moet word,” verduidelik Coetzee. Sy noem voorts dat die snel veranderende wêreld voortdurend nuwe en opwindende regsuitdagings tot gevolg het, waarvoor daar werkbare oplossings gevind moet word. Hierdie soeke na oplossings en antwoorde geskied aan die hand van regsnavorsing.

Fakulteit Regsgeleerdheid gaan van krag tot krag

Volgens Coetzee verteenwoordig die groei en uitbouing van die fakulteit ʼn besonderse hoogtepunt – nie net wat Akademia betref nie, maar óók vir die groter regsopleidingsgemeenskap. In hierdie verband meen Coetzee dat die fakulteit se sterk akademiese span sy grootste bate is, veral gegewe die feit dat die meerderheid van dié akademici ook praktiserende regspraktisyns is.

Die fakulteit bied reeds die LLB-program vanaf 2020 nauurs oor afstand aan asook voltyds op die instelling se kampus in Centurion sedert 2023. Coetzee beskryf die graduering van die eerste groep LLB-studente tydens verlede jaar se kwalifikasieplegtigheid as ʼn “sonderlinge hoogtepunt” vir die fakulteit en voeg by dat sommige lede van dié uitgelese groep alumni reeds tot die regspraktyk toegelaat is. “Ons sien hoopvol én uiters opgewonde uit na die positiewe impak wat Akademia se regsalumni in hul onderskeie gemeenskappe gaan speel,” sê Coetzee.

Op die vraag wat volgende vir die fakulteit voorlê, antwoord Coetzee dat daar uitgesien word na Akademia se vestiging in die Paarl en die gepaardgaande uitbreiding van die regsprogramaanbod – BCom (Ekonomie en Regte) en LLB, hier via die voltydse kampusmodel in 2026. Aansoeke vir die 2026- studiejaar open op 1 April.

Ter afsluiting meen prof. Danie Goosen, uitvoerende hoof: Akademie by Akademia, dat dit bykans onmoontlik is om die betekenis van die instelling se eerste meestersprogram te oordryf. “Een van Akademia se gróót drome is om nagraadse studente te lewer wat op hoë akademiese vlakke presteer, en dié program stel ons studente daartoe in staat. Hierdie meestersprogram verryk die Akademia-wêreld met betrekking tot kennis, insig en beroepsvaardighede op ʼn diepgaande wyse,” sê Goosen.