Die behoefte is groot
en Akademia wil daarin voorsien.
Akademia speel toenemend ’n leidende rol as Afrikaanse hoëronderwysinstelling en is ’n gemeenskapsinstelling geregistreer as maatskappy sonder winsoogmerk.
Die instelling groei teen ’n snelle pas en die behoefte na groter kampusfasiliteite om selfs méér effektief aan die eise van die akademiese lewe te voldoen, neem toe. Hierdie groei en vooruitgang is noodsaaklik vir die voortgesette ontwikkeling en behoud van die Afrikaanse taal- en kultuurgemeenskappe.
Akademia sal by wyse van dié wêreldklas kampus voortdoen met sy roepingstaak om gehalte onderrig aan selfs meer studente in Afrikaans te voorsien terwyl ʼn bruisende studentelewe ook verder sal gedy.
’n Nuwe kampusdroom vir die nabye toekoms
Die nuwe Akademia-kampus, wat op ’n 220 hektaar grondoppervlakte in die ooste van Pretoria gebou word, sal ʼn studietuiste vir 5 000 voorgraadse en 2 000 nagraadse studente wees, asook vir 1 500 inblywende koshuisstudente. Die voorsiende fasiliteite sluit onder andere wêreldklas sportgeriewe, ’n landbou-proefplaas, én verskeie moderne leerruimtes in.
Hierdie kampus gaan egter soveel méér as net ʼn dinamiese akademiese tuiste wees. Dit sal as ʼn node van uitnemendheid die Afrikaanse taal- en kultuurgemeenskappe se intellektuele én kulturele tradisies bewaar en bevorder.
220 hektaar
grondoppervlakte
5 000 voorgraadse
studente
2 000 nagraadse
studente
1 500 studente in
koshuise
’n Vennootskap tussen kultuur en kapitaal
Akademia het die ervare eiendomsontwikkelaar Kanton, wat bekend is vir die pragtige Sol-Tech kampus en sy indrukwekkende koshuisontwikkeling, aangewys om hierdie visie te verwenslik.
Kostes van die ontwikkeling
Die totale meesterplan vir die nuwe kampus beloop R3,2 miljard.
Fase een, wat R1,8 miljard kos, fokus op die daarstelling van die primêre infrastruktuur en grootmaatdienste. Hierdie ontwikkeling sluit die vestiging van noodsaaklike dienste soos water, elektrisiteit en padnetwerke in. Met fase twee, wat later sal volg, sal gespesialiseerde fasiliteite soos gevorderde navorsingsgeriewe en sportinfrastruktuur prioriteit geniet.
ROETEKAART: Tydslyne en mylpale
Die grond vir die kampus is reeds teen ’n bedrag van R50 miljoen aangekoop, en alle grondregte- en hersoneringsprosesse is gevolglik suksesvol afgehandel. Fondswerwing is tans aan die gang, en die grondbreekseremonie vir fase een van die projek word vir Januarie 2026 beplan. Daar word onverpoosd gewerk om die nuwe kampus in
Februarie 2028 vir studente te open, met fase twee wat vroeg 2028 sal volg.
Van toeskouer na toekomsbouer: Só kan jy help
Akademia se kampusontwikkelingsprojek sal deur ’n kombinasie van lenings, beleggings en skenkings vanaf die gemeenskap befonds word.
Skenkings en testamentêre bemakings speel ’n belangrike rol in die sukses van dié projek en verteenwoordig ’n goeie manier vir individue om betrokke te raak. Jou skenking of nalatenskap sal Akademia help om nie net sy kampusdroom te verwesenlik nie, maar ook om lewenskragtigheid aan die Afrikaanse hoëronderwysgemeenskap te gee.
Gemeenskapsbefondsing is ook belangrik, want dit gee aan die Afrikaanse taal- en kultuurgemeenskappe die kans om persoonlik betrokke te raak en só ʼn positiewe en blywende impak te maak. Wanneer ons almal daadwerklik betrokke raak, kan ons méér vermag as ooit tevore en saam bou aan ’n instelling wat nie net vir ons kinders is nie, maar ook vir toekomstige geslagte, ’n baken van hoop sal wees.
Toekomsbouers bewaar hul kultuurerfenis, en bou aan ’n nalatenskap
Om aan Akademia te skenk behels soveel méér as net ʼn blote finansiële transaksie – dit is ’n daad van toewyding en hoop ten einde die behoud van die Afrikaanse taal- en kultuurgemeenskappe te help verseker.
Elke rand wat geskenk word, help om ’n nalatenskap te bou wat vir jare sal voortleef.
Daar is talle voordele daaraan verbonde om as ’n donateur by Akademia se nuwe kampusontwikkeling betrokke te raak. Hier is vyf van die mees betekenisvolle redes:
- Belê in Afrikaanse hoër onderwys: Jou skenking help om die toekoms van Afrikaanse hoër onderwys te verseker en bied aan studente die geleentheid om in hul moedertaal te studeer.
- Bewaar die Afrikaanse- taal en kultuurerfenis: Deur te skenk speel jy ’n rol in die bewaring van die Afrikaanse taal en kultuur en dra jy tot die voortbestaan van ons gemeenskap se unieke identiteit by.
- Skep ’n blywende nalatenskap: Jou bydrae verseker ’n toekoms vir opkomende geslagte, sodat hulle ook kan baat vind by gehalte onderwys in Afrikaans.
- Ontvang belastingvoordele: Skenkings aan Akademia kwalifiseer vir belastingaftrekkings, en jy sal ’n artikel 18A-belastingsertifikaat ontvang om jou bydrae aan te dui.
- Word deel van die dinamiese toekomsbouergemeenskap: Deur aan Akademia te skenk word jy deel van ’n gemeenskap wat roepingsgedrewe saamwerk om ’n instelling te bou wat Afrikaanse hoër onderwys vir geslagte sal ondersteun.
Akademia het dit maklik gemaak om ’n bydrae te lewer. Daar is verskeie maniere waarop jy kan skenk:
Eenmalige skenking of maandelikse bydrae
Maak ’n eenmalige skenking wat Akademia onmiddellik help om aan dringende behoeftes aandag te gee, soos die grootmaatdienste vir die nuwe kampus. Dit is ’n eenvoudige en direkte manier om ’n betekenisvolle impak te maak.
By wyse van maandelikse bydraes kan jy oor tyd ’n gereelde skenking maak wat Akademia help om ’n stabiele inkomste te handhaaf en projekte volhoubaar aan te pak, terwyl dit jou toelaat om jou bydrae gemaklik te versprei.
Gespesifiseerde of ʼn algemene skenking
Kies om jou skenking aan ’n spesifieke deel van die kampusontwikkeling te koppel, soos die aanlê van infrastruktuur óf die oprigting van ’n spesifieke gebou óf fasiliteit, en weet dat jou bydrae presies volgens jou wens aangewend sal word.
Alternatiewelik kan jy ’n skenking gee wat Akademia die vryheid bied om dit aan te wend waar dit die nodigste is. Só dra jy tot die algemene koste van die totale ontwikkeling by, sodat dit suksesvol aangepak en afgehandel kan word.
Let wel, indien ’n skenking nie gespesifiseerd is nie, sal dit uiteraard as ’n algemene skenking hanteer word.
Legaat of erflating
Skenk deur ’n legaat of erflating in jou testament, en verseker dat jou nalatenskap voortleef in die uitbouing van Afrikaanse hoër onderwys, sonder om jou huidige finansiële posisie te beïnvloed.
Elke skenking word waardeer.
Ons weet dat elke individu se vermoë om te skenk verskil, en daarom waardeer ons elke bydrae – groot of klein.
Elke rand bring ons nader aan die voltooiing van Akademia se nuwe kampus en maak ’n daadwerklike verskil. Of jy ’n eenmalige skenking maak, maandeliks ’n bydrae lewer, Akademia in jou testament as begunstigde benoem óf ’n groter donasie oorweeg, elke bietjie help om ons droom te verwesenlik.
Vir dié wat groter skenkings kan maak, hou die volgende in gedagte: hoe meer ons nou insamel, hoe vinniger kan ons die projek voltooi en nóg meer gespesialiseerde fasiliteite oprig.
Skenk nou, bou saam aan die toekoms
Alhoewel die projek eers in Januarie 2025 afskop, kan ons vandag reeds begin om die fondament te lê.
Maak vandag nog ʼn daadwerklike verskil
Stuur gerus ’n e-pos na skenking@akademia.ac.za en een van ons fondsbestuurders sal spoedig met jou kontak maak om ’n besoek te reël en die aard van jou skenking, bydrae of nalatenskap te bespreek.
WORD ’N TOEKOMSBOUER.
Sluit aan en help ons om ’n blywende nalatenskap te bou.
Skenk nou, en wees deel van iets groter – ’n projek wat ons gemeenskap vir jare sal dien.
