ʼn Tuiste is soveel méér as net ʼn fisiese adres. Dit is ʼn gevoel, ʼn veilige hawe, die gerusstelling van behoort én ʼn vaste wete dat jou menswees diep geanker is. Aan die een kant is dit ʼn plek wat gekenmerk word deur diepe heimwee, maar óók aan opwinding, vernuwing en daadwerklike groei. Akademia, as ʼn studietuiste, spreek tot die denke sowel as die hart van sy studente en in die geval van sy gewaardeerde alumni neem dié tuiste oor bestek van jare die vorm aan van ʼn dinamiese en ewigdurende verbondenheid. In kort: tuiskoms as ʼn alumnus beteken om onlosmaaklik verbind te bly aan alles wat dié instelling as studietuiste vir jou verteenwoordig.

ʼn Onlosmaaklike verbintenis

Monica Mynhardt, voorsitter van Akademia se alumnikomitee, verduidelik dat die oomblik wanneer ʼn Fontie oor die kwalifikasieplegtigheidverhoog stap, die verhouding tussen die student (nou ʼn alumnus) en die instelling (nou die alma mater) op ʼn ingrypende wyse verander. “ʼn Skeiding kom wel met die fisiese plék waarin tasbare gemeenskapsgeborgenheid tot op hierdie stadium vir jou as student gehuisves was, maar danksy Akademia se vormingservaring verlaat alumni hul alma mater as ʼn goed gevormde individue onderweg na hul eie hoopvolle toekoms,” sê Mynhardt. Sy beklemtoon voorts die feit dat ten spyte van hierdie skeiding, daar in wese nóóit ʼn breuk tussen die instelling en sy alumni plaasvind nie.

Binne hierdie milieu bly elke oud-Fontie onlosmaaklik verbind tot alles wat sy alma mater verteenwoordig – ʼn besonderse voorreg wat op ʼn besondere manier gekoester moet word. Een van die kerndoelwitte van die alumnikomitee is juis volgens Mynhardt om elke alumnus in staat te stel én te begeester om trots sy of haar plek op te neem binne die verbondsverhouding oor generasies heen waarbinne Akademia as klassieke gemeenskapsinstelling leef.

ʼn Groot jaar vir Akademia en sy alumnigemeenskap

Volgens Mynhardt verteenwoordig 2025 ʼn gróót jaar vir die instelling en daarom óók vir sy alumnigemeenskap. Hoogtepunte sluit onder meer in die voorbereiding vir die vestiging van ʼn satellietkampus in die Paarl in 2026, die toevoeging van verskeie nuwe akademiese programme tot die instelling se programverskeidenheid, die grootste kwalifikasieplegtigheid nóg én die voortsetting van die Toekomsbouer-veldtog. Laasgenoemde bereik vanjaar ʼn kritiese prioriteitspiek in terme van ontwerpsontwikkeling, massagrondwerke en kapitaalwerwing ten einde Akademia se droom van ʼn wêreldklas kampus in Pretoria te verwesenlik.

“Akademia se kampusinfrastruktuur is die mees tasbare vergestalting van die weg waarlangs elke alumnus in en deur die instelling se vormingsideaal tydens hul studie gesmee word. Selfs al gaan alle alumni nie hul eie studie op die droomkampus of selfs op enige satellietkampus voltooi nie, het elke alumnus die fondasie vir die finale monument help lê,” sê Mynhardt.

Hierbenewens vier Afrikaans vanjaar sy eeufees as amptelike taal. En Akademia, as ʼn trotse Afrikaanse onafhanklike hoëronderwysinstelling, voeg sy stem trots by verskeie ander Afrikaanse taal- en kultuurgemeenskappe om dié merkwaardige hoogtepunt te vier. Een van die maniere waarop die instelling hierdie mylpaal gestand doen, is by wyse van sy toegewyde jaartema, Afrikaans en tuis. “In die jaar waarin Afrikaans se eeufees gevier word, behoort elkeen van ons opnuut bewus te word van die ewige verantwoordelikheid op ons skouers om soos elke geslag tevore, in die woorde van NP van Wyk Louw, die skat van ons taal en kultuur veilig deur die skare te dra.”

“Sonder instellings soos Akademia is taal- en kultuurgemeenskappe futloos, en sonder mense (gemeenskappe) sal instellings leeg loop,” sê Mynhardt en verduidelik dat ʼn ongefokusde liefde vir taal en kultuur nie genoeg is om die florerende voortbestaan daarvan te verseker nie. In die lig hiervan moedig sy elke alumnus aan om as ʼn vlagdraer op te tree – nie net van die instelling nie, maar óók van die breër taal- en kultuurgemeenskappe waarbinne Akademia bestaan. “Die gemeenskapsverbondenheid en -betrokkenheid waardeur alumni gevorm word, dien as die vrugbare grondslag waarop elkeen van ons as toekomsbouers ook by instellings in ons eie gemeenskappe betrokke kan raak,” meen Mynhardt.

ʼn Propvol gebeurlikheidskalender vir alumni

Volgens Mynhardt kan alumni vanjaar uitsien na verskeie geleenthede om gemeenskapsgeborgenheid in persoon te ervaar. Hierdie geleenthede sluit onder meer in alumni-ontbyte in Bloemfontein, Pretoria en die Paarl waartydens alumni by industrieleiers kan leer terwyl hulle met mede-alumni netwerk. Verskeie webinare gaan ook aangebied word met die doel om alumni toe te rus om hul onderskeie loopbaanpaaie verder uit te bou. Tydens vanjaar se Fontie-spele gaan lede van die alumnigemeenskap ook die geleentheid hê om self deel te neem én as ondersteuners dié eiesoortige studentegeleentheid by te woon.

Verskeie nuwe inisiatiewe sal ook van stapel gestuur word. “Een van die komitee se grootste doelwitte vir hierdie jaar gaan wees om ʼn beter idee te kry van hoe Akademia se alumni van die heel begin af lyk. Ons gaan deur die loop van die jaar dus werk aan ʼn groot databywerkprojek om ʼn beter blik te kry op wie ons alumni is, waar hulle nou is, hoe hulle by hulle alma mater betrokke wil bly en hoe ons hulle kan bystaan in hulle loopbaanweë,” vertel Mynhardt. Sy verklap ook dat alumni wat aan dié projek gaan deelneem die kans staan om lekker pryse vir hulself los te slaan. Meer inligting hieroor volg binnekort.

Raak betrokke en bly verbonde

Volgens Mynhardt vorm alumni deel van die instelling se klassieke gemeenskapstradisie. Prakties beteken dit dat die instelling sy studente vorm, en dat studente – en alumni, wat in verbondenheid betrokke bly, op hul beurt hierdie karakter van die instelling herbevestig.

In die lig hiervan nooi Mynhardt alle alumni aan om aktief betrokke te raak by hul alma mater in welke wyse ook al. Hierdie betrokkenheid kan die vorm aanneem van geleentheidsbywoning, die bywerk van hul kontakbesonderhede, die deel van hul loopbaansuksesverhale én diensbaarheid as mentors, ondersteuners en toekomsbouers.

Vir meer inligting besoek die webblad hier.