Die jaar 2025 sal in die geskiedenisboeke aangeteken word as ʼn besonderse feesjaar vir die Afrikaanse taal. Op 8 Mei vanjaar sal dit presies 100 jaar wees sedert Afrikaans ʼn amptelike taal van Suid-Afrika geword het. In die lig hiervan skaar Akademia, as ʼn trotse Afrikaans onafhanklike hoëronderwysinstelling, homself heelhartig by die viering van dié grootste taalhoogtepunt. Een van die maniere waarop die instelling hierdie eeufeesviering gestand doen, is by wyse van die L-E-E-S!-projek.

Die L-E-E-S!-projek is daarop gefokus om leervaardighede en taalbegrip op skoolvlak te bevorder met die doel om leerders taalvaardig voor te berei vir hul naskoolse studiereis. Hierdie voorbereiding geskied aan die hand van deelname aan verskeie pretaktiwiteite en kompetisies asook die beskikbaarstelling van nuttige hulpbronne ter ondersteuning van die taalleerervaring. Hierdie projek vind in samewerking met verskeie ander lede van en inisiatiewe vanuit die Afrikaanse taal- en kultuurgemeenskappe plaas, waaronder die ATKV, die Virtuele Instituut vir Afrikaans (VivA), Afrikaans.com, die AfriForum Dink of Sink-debatskompetisie, die Nasionale Interskole Redenaarsliga, Podiumpret asook die Akademia-taalsentrum.

ʼn Propvol L-E-E-S!-kalender, wat vanaf Februarie tot November strek, betrek laer- én hoërskoolleerders van dwarsoor die land. Verskeie kompetisies maak deel uit van dié kalender en sluit onder meer in:

• Idiomekompetisie soos aangebied deur Podiumpret

Laerskoolleerders vanaf graad 6 tot 7, en hoërskoolleerders vanaf graad 10 tot 11, stel hul idioomkennis op die proef en bevorder só hul taalbegrip en liefde vir die eiesoortige uitdrukkingskrag van hul moedertaal.

• Uitklopspel soos aangebied deur die ATKV in samewerking met Akademia

Tydens hierdie taal- en begripsvaardigheidskompetisie word leerders vanuit al nege provinsies se spelvaardighede getoets.

• Dink of Sink-debatskompetisie

Hierdie goed gevestigde debatskompetisie rus leerders toe met goeie kommunikasievaardighede en die vermoë om krities na te dink oor aktuele sake van die dag.

• Nasionale Interskole Redenaarsliga soos aangebied deur VivA, Afrikaans100 en RSG

Dertien jaar ná die ontstaan van dié gewilde redenaarsliga verteenwoordig hierdie platform een van die grootste en mees gesogte debatskompetisies in die land.

Wat taalhulpbronne betref stel Akademia, Afrikaans.com en VivA verskeie artikels, naslaangidse, woordeboektoepe, infografika en aanlyn aktiwiteite soos werkskaarte, stories en speletjies beskikbaar vir junior en senior leerders.

Volgens Mareli Swanepoel, bestuurder: Institusionele projekte en ondernemings by Akademia, verteenwoordig die L-E-E-S!-projek een van die maniere waarop die instelling sy verbondenheid tot Afrikaanse moedertaalonderrig uitleef. “Danksy hierdie projek, en die vennote wat hande vat, rus ons leerders speel-speel toe om taalslim te word, en in die proses vier en koester ons die veelheid wat in ons moedertaal opgesluit lê,” meen Swanepoel. Sy voeg by dat sy opgewonde is oor die toekomsvooruitsig van die projek en dat, tesame met die deelnemende vennote, dit duidelik is dat die polsslag van Afrikaans sterk en gesond is.

Hou gerus Akademia se sosialemediaplatforms dop vir meer inligting en foto’s wat met dié projek verband hou.